Ако нѐ следите (фала ви ❤️) веројатно веќе сте запознаени со најголемиот дел од бендовите и музичарите кои го сочинуваат младиот музички бран Гола планина. Дел од нив се Занаду, Хајка, Луфтанза, Vagina Corporation, Стој, после!, Дивоградба, КЕМ, Димиш, corrosion – чии песни го сочинуваат првото физичко издание на овој колектив!
Ова издание се појави ненадејно на 11.02.2023, а тие го најавија на нивните профили на социјалните мрежи:
„Нѐ чекавте, помина еден месец, два. Ние се оформувавме, собиравме, боревме и си помагавме. Бранот доаѓаше и си одеше, нѐ имаше по вести, весници и портали, за работи по кои не требаше да нѐ запознаете. Но, еве, после сите сопки и ридови, денес, изненадно и ненајавено, го вадиме нашето прво издание.
ЦД компилација од најдоброто за 2022 од нашите бендови Голопланинци, во колаборација со студентското списание Умник (@umnik.flu )!
Како добар повод го избравме роденденот на Култура Бета, како причина за сплетување на пар македонски културни активисти и ентузијасти, заеднички да го прославиме и да им го честитаме. Една голема благодарност до нив и нивната извонредна работа како поддржувач на сите гранки на младинската култура денес, како и младите уметници и општествените активисти. Среќен роденден, @kultura_beta!!“
Секако, оваа компилација можете да ја слушнете на нивните Спотифај и Јутјуб канали, но ние би ве охрабриле да ја купите на нивниот Bandcamp профил. Купувањето на ова издание ќе го направите со вкупно 5 клика, а не ви е потребен ни кориснички профил на Bandcamp! Минималната цена е $3 или околу 180 денари, а доколку сакате можете да им дадете и нешто повеќе од тоа. Износот го внесувате рачно, во американски долари.
Со купување на нивните изданија, им помагаме на овие млади музичари да продолжат да работат и да создаваат уметност, но уште повеќе од тоа им ја искажуваме нашата благодарност што ја развиваат нашата култура и креативната музичка индустрија.
Секогаш кога можете, се надеваме дека ќе одберете да ги поддржите младите уметници.
