Честитки за вашето прво издание! Раскажете ни ја приказната за вашиот бенд. Која е идејата што ве обединува? Кои се вашите влијанија?
– „Red18“ е бенд формиран во септември 2021 година. На почетокот немавме планови за авторска музика, само сакавме да свириме заедно и со тоа направивме само еден концерт односно трибјут на бендот „Paramore“ на „Underfest Festival 2021“. Искрено се изненадивме од реакцијата на публиката, концертот помина одлично и покрај скептицизмот дали бендот „Paramore“ ќе привлече доволно интерес кај нас, но многубројната публика и енергијата во „Јавна соба“ таа вечер, го одговорија тоа прашање. Идејата на бендот е едноставна – го формиравме бендот за да свириме заедно и да креираме музика без да се етикетираме со каков било жанр, едноставно да создаваме музика без да имаме какви било ограничувања. Сите во бендот имаме различно влијание и различен вкус за музика.
Кажете ни повеќе за вашетo прво издание, песната и анимираниот спот за „Kingdom of Lies“.
– Нашето прво издание со наслов „Kingdom of Lies“ е првиот сингл од нашиот прв албум „Red18’s Grit“, кој ќе биде целосно објавен на 18 ноември. Продуцент на целиот албум е Дени Крстев, додека сè освен тапаните е снимено во студиото на нашиот гитарист Јован Чифлигароски (J&J Studio). Видеозаписот е изработен од RatSeize, а омотот за песната го изработи Дамјан Шокев. Темата и пораката на песната се едноставни и ќе ви бидат јасни откако ќе ја ислушате.
Што можеме следно да очекуваме од вас? Кои се вашите соништа за иднината на Red18?
– Како што веќе напоменавме, нашиот прв албум е целосно готов. Се состои од 7 песни, од кои 3 сингл песни (една со анимиран спот и две песни со снимени спотови). Официјален датум на објавување на албумот е 18 ноември годинава. Секоја песна на албумот испадна различен жанр и различна тема, баш како што планиравме, на што сме особено горди. Планот за иднината на „Red18“ е во јануари/февруари да издадеме EP што ќе се состои од 3 песни на македонски јазик, а потоа следното лето и втор албум на кој веќе почнавме да работиме.
Како би можела публиката на PopUp да ве поддржи?
– Секој може да нè поддржи со тоа што би го слушал и би му дал шанса на нашиот албум во целост на која било музичка платформа, би се претплатил на нашиот Јутјуб-канал (Red18), би го заследил нашиот Инстаграм-профил (red.18) и би ја лајкнал нашата ФБ-страница (Red18), и секако би дошол на некој од нашите свирки/концерти или настапи на фестивали во иднина. Би биле бескрајно благодарни.
Автор: Клелија Живковиќ
Фотографија: Tongue photography
Илустрации: Ива Ѓорѓиевска
