„Со огромна тага ве известуваме дека Амок радио ги затвора своите врати и последното емитување ќе биде в сабота, 8 октомври 2022. Мораме да ги преиспитаме нашите планови за иднината, визии, цели и начини на финансирање“, пишува тимот на Амок радио, во обраќањето до своите слушатели и поддржувачи.
Амок радио почна со работа во јануари 2021 година, предводено од желбата за грижа за својата заедница и локалната сцена. Како некомерцијална музичка платформа, Амок радио е безбеден простор за домашни и меѓународни изведувачи, диџеи и таленти во зародиш што сакаат да ја споделат својата работа со публиката, да соработуваат и да се надополнуваат едни со други. Во дигиталниот простор Амок ни претстави разноликост од личности, музички правци и содржини, а во физичкиот простор ни ги пружи „Wax Revival Store“, единствената физичка продавница за плочи од областа на денс-музиката во Скопје, и Амок бар.
Оваа екипа млади ентузијасти ни покажа дека дури и во еден од најтешките периоди постојат можности за формирање заедница и консумирање културни содржини, сè додека постојат идеи и индивидуи што се спремни да вложат труд во нивната реализација. Впрочем, културната сфера опстанува поради вакви иницијативи, индивидуи и идеи.
По речиси две години активна поддршка и воздигнување на локалната и на регионалната денс-сцена што значително го збогати нашето секојдневие, тие велат дека е време да продолжат понатаму. „Ништо од она што го постигнавме досега не би било возможно без поддршката од нашите слушатели, резиденти и гости, кои се дел од нашето семејство, за што сме бескрајно благодарни“, вели тимот, најавувајќи дека ова не е крајот и тие продолжуваат да работат на нови проекти. Во меѓувреме, ја канат својата заедница да го прослави она што досега заедно го создадоа.
Автор: Клелија Живковиќ
Фотографии: Александра Костадиновска
