Претставата во режија на Драгана Гунин е театарска адаптација на истоимениот роман на Петар Андоновски, кој годинава беше една од наградените книги од англиските ПЕН-награди. Романот се смета за првиот македонски квир роман и ја раскажува приказната за љубовта и за пријателството помеѓу Бојан, Иван и Владо.
– „Лето во кое те нема“ е прв роман на Петар што го адаптирам и го поставувам на сцена. Првин сакав да го работам „Страв од варвари“ и сè уште ми стои таа желба, за некогаш во иднина. Но, коцките се наместија така, па „Лето…“ си доби предност. Со авторот имавме лесна соработка и комуникација. Тој реши процесот на драматизација да ни го препушти мене и на Ева, ама беше тука за предлози и беше присутен низ целиот процес на создавање на претставата. Мислам дека уживаше на пробите – ни раскажа режисерката Драгана Гунин.
За актерската екипа што ја сочинуваат Марко Трајковиќ, Марко Богдановски, Ангела Стојановска и Игор Трајковски, режисерката вели: „Тоа е екипа за која сонува секој/а режисер/ка. Отворени, дисциплинирани и спремни за партнерска игра и за поинаков израз. Многу сум среќна и горда на целата екипа, од актери до сите соработници што беа вклучени во продукција на претставата. Мислам дека треба да се има посебен тим покрај себе за да се направи ваква претстава и многу сум им благодарна на сите за присуството и за работата.“
Драматизација ја направи Ева Камчевска, сценографијата е на Крсто Богојевски, дизајнот на костимографија на Ивана Цветковска, а авторка на музиката е Гала Насева. Дизајнот на постерот го осмисли Симона Гаштарова.
– Премиерата помина многу убаво и можам само да посакам сите наредни изведби да бидат приближно толку добро прифатени од публиката како таа вечер. Во план е претставата да се игра на повеќе места, а Скопје е едно од првите и едвај чекам да ја прошетаме – најавува Гунин.
По распродадената премиера, претставата повторно ќе се одигра в понеделник, на 26.9.2022 година, во 20 часот. Билетите се продаваат во кумановскиот Центар за култура.
Автор: Клелија Живковиќ
Фотографии: Иван Михајловиќ
