Europe House Bitola месец септември го започнува со автентична изложба на графички симболи, која брои дури 460 дела во мал формат.
yugo.logo е проект на младиот графички дизајнер Огнен Ранковиќ, кој вели дека симболите кои ќе ги видиме се создадени пред повеќе од половина век, но стандардите по кои се креирани, концептот и естетиката ги прават безвременски.
Изложбата ќе ја отвори нашиот драг и почитуван професор Костадин Танчев – Динка, кој во својот богат и разновиден творечки опус создава и многу графички симболи кои и ден денес се препознатливи и функционираат во нашата земја. Грбот на Битола е еден од нив.
Проектот yugo.logo има за цел да ги истражи, дигитализира и архивира овие знаци со цел да им послужат како инспирација на новите генерации, а истовремено и да им се даде почит на пионерите на дизајнот на овие простори.
Приказна за знакот
Графичкиот знак нема оригинал, материјал и големина. Секој еден е оригинал и се изработуваат од секакви материјали и во секакви големини. Знакот е потпис, па затоа авторот не го потпишува. Конструкцијата на знакот е негова графичност со која се овозможува тираж (умножување, зголемување, смалување). Знакот е збиена приказна, понекогаш и неколку различни приказни, кои се сведуваат на еден краток збор. Зборот се претвора во слика која ја читаме со еден поглед: побрзо ја гледаме и запомнуваме отколку што ја разбираме. Знакот е поубавиот дел од приказната. Секој знак е една нова љубов, а за љубовта се сонува и се размислува на јаве, сè се меша и затоа не се знае како настанува знакот. Знакот е лесна мака.
Милош Ќириќ – извадок од книгата „Графичка идентификација“, Белград, 1981 година.
