Дечки, првпат муабетевме кога излезе вашата прва песна „Kingdom of lies“. Што се случуваше оттогаш? Раскажете ни како растевте во изминатава година.
– Така е, помина речиси една година од нашето последно интервју со PopUp! Многу работи се случија, имавме многу настапи во неколку градови во Македонија, а и настап на еден предобар showcase фестивал во Софија (Бугарија) наречен SoAlive. Полека созреваме како бенд, константно учиме од сите случувања и одиме напред. И, ете, конечно сме пак тука со нов материјал, кој едвај чекаме да им го претставиме на сите!
Вашата нова песна „Единствен“ е дел од вашето ново ЕР „Игра“. Кога можеме да го очекуваме ЕР-то?
– Нашето ново EP насловено „Игра“ ќе биде објавено концептуално односно секоја песна ќе биде објавена како сингл со видео, за на крај да се дојде до една целина што ќе биде целосно EP – „Игра“. Поради таа причина официјален датум на објавување на EP-то, нема да има.
Раскажете ни повеќе за креативниот процес за правење на ова ЕР. Кој е тимот што стои зад него? Што ги инспирираше песните и видеоспотовите што ќе бидат дел од него?
– Главно тимот зад целото EP сме ние како бенд, нашиот продуцент Дени Крстев, а за видео планираме да соработуваме со неколку луѓе што се огромна поддршка на Red18. Песните и видеоспотовите се главно инспирирани од љубов, но исто така инспирирани сме и од секојдневниот живот во нашата држава, пријателствата, урбаниот живот во Скопје итн. Креативниот процес на создавање песна на нашиот бенд е секогаш различен, целиот бенд е вклучен во создавањето.
Се ближи крајот на годината. Имавте неколку настапи во живо во 2023 година, кој ви беше омилен? Каде ќе ве гледаме следно?
– Ако мора некои настани да се издвојат, тоа би биле:
– SoAlive најмногу поради неверојатната организација на нивниот тим.
– Д Фестивал поради тоа што публиката беше одлична и направија да се чувствуваме како ѕвезди!
Но, ако зборуваме за омилен настап, за нас не постои такво нешто, секој настап е различен и си има своја магија. До небо сме благодарни за секоја можност што ни се дава да го правиме тоа што сакаме да го правиме повеќе од сè.
Заследете нè на Instagram (_red.18_) или на Facebook (Red18) затоа што наскоро ќе имаме многу интересни новости за што ќе биде следно.
Клелија Живковиќ
Фотографии: Гоце Лалковски
