Единствен од ваков вид, кој комбинира уметност, дизајн и архитектура, фестивалот ни овозможува за момент да погледнеме во иднината. Но иднина каква што би посакале, спротивно од кое било апокалиптично сценарио или утопистичка визија. Иднина базирана на вредности, знаење и нови пристапи.
Уметници, архитекти и дизајнери со креативни идеи и уметнички проекти се дел од девет изложби на различни локации во градот. Нивните храбри визии за употреба на артифициелна интелигенција и нови технологии, во обликување иновативни начини на работа, заедничко живеење и одговорно консумирање, отвораат нови перспективи на централни теми што го засегаат нашето време.
Во овој контекст изложбата HYSTERICAL MINING и мултимедијалното шоу UNCANNY VALUES се обидуваат да понудат одговори за улогата на технологијата во создавањето структури на моќ и форми на идентитет и истовремено го доловуваат потенцијалот на вештачката интелигенција во секој сегмент на нашите животи.
Инсталацијата CHANGE WAS OUR ONLY CHANCE е сместена во блиска иднина, во 2047 и претставува оптимистично доживување на светот доколку би ја употребиле можноста на уметноста во обликување на социјалниот развој.
Human by Design, CLIMATE CHANGE! и реинсталацијата на постојана музејска изложба MAK DESIGN LAB прикажуваат концепти и иновативни решенија како реакција на итната потреба за промена и одржливост. Со обликување на начинот на кој живееме заедно, на кој им пристапуваме на ресурсите и начинот на кој работиме, дизајнот како мотор на промени може позитивно да им се спротистави на климатските промени и од масовно потрошувачко да преминеме во одржливо квалитетно општество.
Миграцијата во урбани подрачја во потрага по подобар живот секојдневно наметнува нови предизвици за да овозможат градовите домување, работа и рекреација. Во изложбите FUTURE FACTORY и Future City фокусот е ставен на односот помеѓу човекот и интелигентното домување, кое истовремено треба да нуди задоволство, економска исплатливост, енергетска ефикасност, одржливост и социјална интеракција. Додека овие две изложби нудат визии за подобра иднина, SPACE AND EXPERIENCE ни прикажува избор од реализирани архитектонски проекти што веќе овозможуваат подобар живот денес.
Анна
