Страјк – човекот кој е обележан како врвен уметник на македонскиот хип-хоп со сурово искрен и моќен израз, утре ќе го промовира третиот самостоен албум „Низ мојот живот“. Настанот ќе ги собере почитувачите на неговата музика во Младинскиот културен центар со почеток од 21 часот.
Страјк е еден од основачите на Легијата и својата работа ја започува во далечната 1997 година. Воедно е и еден од првите артисти што остварија соработка со „Шурикен Рекордс” каде се појавува на првото издание „SK Street Beatz”. Во 2001 година, заедно со Блажеј ја формираат групата СТР2 – насловена по графитите на Страјк, кратенка за „Стриктно Тврди Рими/Сон-Темнина/Реалност”. Нивниот албум „Не заборавај“ беше издаден во јули 2007 година. Во 2002-ра тој настапува како диџеј на Да Џака Накот, со што покрај графитите и рапувањето ја опфаќа и третата гранка на хип-хопот – диџејството, а следната година започнува активна соработка со Dj Goce (С.А.Ф). Неговиот прв соло студиски албум „Кутија“ доби позитивни оценки од музичката критика и хип-хоп публиката воопшто, а во 2015-та го продолжи овој успех и со вториот албум „Земен Рај“ продуциран од Dj Goce, како и со бројните соработки со артисти од Легијата.
