На 19 години го освојува првото место на национален натпревар по танцување со соло-перформанс, микс од voguing, хипхоп и aфрикански танц. По овој успех, примен е на престижната школа за современ танц PARTS во Брисел, паралелно настапувајќи со различни компании како танчар.
Својата импресивна кореографска кариера ја почнува во 1999 година со мјузиклот „Anonymous Society“ во Лондон и оттогаш има работено на повеќе од педесет проекти, опфаќајќи современ танц, театар, балет, опера, филм, музика и секаков вид перформанс. Во 2010 година основа своја компанија „Eastman“ во родното место Антверп.
Како посебна вредност на неговиот пристап се смета неговото нехиерархиско поимање на односот: движење, говор на тело, култура. Неограничениот интерес му отвора соработки секаде низ светот со изведувачи со различна возраст, физикус, техники, националност и јазик и притоа не се стреми кон нивно обединување туку напротив им дава сценски живот на нивните културни особености.
Шеркауи иако во улога на кореограф многупати учествува заедно со изведувачите, работи и во дует со други кореографи, избирајќи партнери што имаат драстично поинаков израз од неговиот. Отворен за различни жанрови, експериментира со звуци, реквизити, проекции и често користи средновековна музика.
Во 2015 година за првпат е режисер на целовечерна претстава, „Pluto“ за јапонскиот театар Bunkamura, според наградуваните манга-стрипови на Наоки Урасава и Такаши Нагасаки, каде што го донесува манга-ликот Astro Boy на сцена.
Неговото повеќепати наградувано кореографско мастер-дело, перформансот „Sutra“, во продукција на театарот Sadler’s Wells во Лондон, во кој самиот настапува заедно со 20 монаси од Шаолин храмот од Кина, веќе 11 години е на турнеја низ целиот свет и е прикажан во 33 земји, пред 160.000 луѓе публика.
За својата исклучителна работа Шеркаи е носител на огромен број признанија, меѓу кои: две награди Olivier, четирипати е прогласуван за кореограф на годината од „Tanz Magazine“, награди за најдобар кореограф во балет, театар и филм, за продукции во целост, специјална награда на БИТЕФ. Прогласен е за културен амбасадор и е добитник на награди за придонеси во меѓучовечките односи, заемна толеранција и интеркултурален дијалог.
Aнна
