Ромео Кастелучи – театарски режисер на годината

Неговиот сценски израз значајно e детерминиран од неговиот примарен интерес за уметноста. Кастелучи дипломира сценски дизајн и сликарство на Академијата за фини уметности во Болоња, што игра улога во создавањето радикално поинаква перцепција за театарот. Нарекуван визионер и пророк, Кастелучи со својот холистички пристап создава комплексен, визуелно богат, театар на слики изразувајќи моќен естетски и политички став, а неговата театарска естетика претставува синтеза од уметности.




На митските приказни гледа како на неисцрплив извор на сценски материјал, ги доведува до нивната суштина и одново ги преведува во слики, звуци, физичка присутност, во претстави со совршена оркестрација, ритам и асоцијативност.




Неговите претстави се културен шок, зачудуваат, вознемируваат и истовремено нудат ослободување. Допираат онаму каде што човек не бил или одбива да оди, во својата неоткриена природа на стравови и чувства, потсвест, соништа, нудејќи драматично сензорно искуство за публиката и менувајќи ја нејзината перцепција за себеси и за човештвото.




Кастелучи своите ставови за театарот и режијата ги канализира и во теоретски есеи, базирани на личното театарско искуство и истражување. Меѓународно признат со многубројни продукции зад себе и кариера во повеќе од педесет земји, неговото име е присутно во сите значајни театарски институции и фестивали во светот.




Наградуван е со највисоки театарски признанија како комплетен автор, но и за различни сегменти од неговата работа. Носител на почесни уметнички титули, Кастелучи уште еднаш е прогласен за режисер на годината според магазинот „Opernwelt“, а неговата сценска визија на Салома од Рихард Штраус во продукција на Salzburger Festspiele и Виенската филхармонија, за продукција на годината.
Анна