PrivatePrint Studio ја започна соработката со Ивана Мирчевска на почетокот на оваа година и таа подразбираше создавање на уметничка книга и развој на изложба како еден проект поврзан во целина. Поаѓајќи од феноменологијата, концептот на Мирчевска предлага посебен агол на гледање, агол од 45 степени, којшто е лоциран во просторот помеѓу телото (замислено како оска ‘y’) и нашата перцепција (оска ‘x’). Аголот од 45 степени е местото каде што тие се сретнуваат, каде што тоа што се гледа и тоа што се допира е едно исто, каде што тие се обединети во желбата да се разберат еден со друг. При работата на овој проект Мирчевска развива метод на гледање (surfacing) преку кој се предизвикуваат нормираните претпоставки за телото и за нашата перцепција и се раскршуваат доминантните модели на ориентацијата.
Проектот е спонзориран од Prince Claus Fund for Culture and Development.
Ивана Мирчевска (родена 1992 г., во Скопје) е визуелна уметница и истражувачка чија уметничка практика е вкоренета во временски заснованите медиуми, визуелната антропологија и сликарството. Истражувањата на Мирчевска се во сродност со темите коишто произлегуваат од спојот помеѓу технологиите на гледање, просторната конфигурација на погледот и телото. Користејќи ја есеистиката како рамка, нејзината практика спојува различни видови субјективности од минатото и од сегашноста, коишто се манифестираат како слики, алтер ега, документи, површини и гласови. Ангажирајќи се со културните предрасуди и потенцијалите на телото и неговата визија, нејзиниот пристап ја вклучува кревкоста и кршливоста на телото со поглед кон неговите можности да дејствува и да се грижи. Движејќи се низ различни референци и полиња на знаење (од теорија на уметност до студии за медиуми, од феминизам до афективна теорија) нејзината работа се одвива помеѓу подвижни слики, звук, архиви и инсталација. Дипломира сликарство на Факултетот за ликовни уметности во Скопје (2015) и магистрира визуелни уметности на Академијата за ликовни уметности Брера во Милано, Италија (2018/2019).
