Македонските уметници Драгана Заревска и Ѓорѓи Десподов на 3-ти јуни ја отвараат својата соло изложба “A Girl Named Work” (“Девојка наречена Работа”) во галерија Цејла во Брно, Чешка. Изложбата прикажува долгорочна соработка помеѓу двајцата уметници, а инсталацијата е изработена во периодот помеѓу март 2023 и мај 2024 и претставува трилогија базирана на три поеми од Заревска – “Кралица на Нешто”, “Маргарет” и “Иднината на работата”.
Посетителите се поканети во атмосфера на контрадикторност – постчовечки пејзаж и една кралица која пробува да се снајде во него без да се вознемирува премногу од истиот. Делото е отворена дискусија за работата, идентитетот, отпорот, и што значи да се биде жена на крајот на светот. Покрај ова, афирмативно се обраќа и на жените (но не само нив) кои протестираат преку одмор, безгрижност, пишување поезија и преку ослободување од вина додека светот се топи под жегата на секојдневното зло.
Изложбата ќе трае до 18.07.2024, а поддржана е од галерија Цејла и факултетот за ликовни уметности при техничкиот универзитет во Брно.
