Се смета дека денешните исландски коњи се уникатни бидејќи се директни потомци на коњите на викинзите, кои тие ги донеле при преселбата од Континентална Европа.
Исланд ги има поставено и основите на парламентаризмот во Европа. Имено, во 930 година се оформил првиот Парламент во денешниот национален парк „Тингвелир“ (Þingvellir). Оттогаш, ова место е под заштита на УНЕСКО како светско наследство поради својата културна, историска и географска значајност.
Во Исланд може да се види едно од двете ретки места на планетата каде што се среќаваат две тектонски плочи над Земјината површина. Се работи за северноамериканската и евроазиската плоча, кои секоја година се разделуваат за два сантиметри. Исланд е и мошне активна земја на геолошки план. Има повеќе од 125 вулкански планини, од кои неколку се активни, а други, пак, лесно можат да се разбудат и да се активираат. На островот се случува вулканска ерупција на речиси секои четири години.
Поради ваквата постојана активност, Исланд е прекриен со полиња со лава. Како контраст на тоа, голем дел од земјата е прекриен со глечери. Сè што не било допрено од стихијата на магмата и на земјотресите е прекриено со лед. Затоа исландските пејзажи се толку ретки и единствени.
И не е точно дека на Исланд не растат дрвја. 😊 Кога пристигнале, викинзите ги исекле речиси сите дрвја во земјата. Оттогаш има повторни обиди да се посади шума, но може да се забележи дека тоа некако оди тешко. И покрај тоа, Исланд е една од најеколошките земји во светот. Бидејќи земјата е „жива“ поради вулканската активност, во голема мера ја користи хидро и геотермалната енергија. На Исланд многу малку се употребуваат фосилни горива, а повеќето домови користат геотермални води што се испумпуваат од под градовите и селата.
Исланд е една од ретките земји во светот што нема „Мекдоналдс“. Тоа е веројатно и единствената сличност со Македонија (ха-ха). На Исланд може да се пробаат кит, сува риба, ферментирана ајкула, глава од овца, па и маринирани тестиси од овен. Bon appetit! 😊
Педесет проценти од Исланѓаните веруваат во постоењето на фантастични суштества како елфови и тролови. Има голем број приказни и легенди за нив, а Исланѓаните одат толку далеку со тие верувања што одложуваат и градежни проекти ако се верува дека ќе се гради на место каде што живеат елфови. На островот се верува дека паднатите карпи по полињата се смрзнати тролови и дека мирисот на Исланд не е од сулфурот, туку од смрдливата вода во која се капеле троловите. 😊
Бидејќи се наоѓа близу до Арктичкиот круг, островот се одликува со долги зимски и долги летни ноќи – 24 часа мрак/самрак во декември и 24 часа светлина во јуни. Затоа на Исланд може да се видат и поларната светлина и полноќното сонце.
фотографии: Ратко Додевски
