Ирина Тошева ќе изјави: „Земи ја четката и обој го умот“. Што точно го „боеше“ умот на дизајнерката во процесот на креирање на колекцијата „EUNOIA“?
Подготвувајќи ја новата летна колекција инспирирана од сликарството, на ум ми беше да ја претставам есенцијалната улога на уметноста за внатрешната благосостојба на секоја индивидуа. Поточно, мирот и слободата што ги чувствуваме откако ќе се пренесат емоциите на парче хартија или на платно.
Колку време ти беше потребно да ја создадеш колекцијата „EUNOIA“, од идеја до реализација?
Во споредба со претходните, изработката на колекцијата „EUNOIA“ траеше значително подолго, делумно и поради низата проекти на кои работев паралелно со нејзиното создавање. Идејата за темата потекнува од декември минатата година, кога започнав да го истражувам влијанието на уметноста врз менталното здравје и арт-терапиите. Потоа следуваше потрагата по идеалните материјали, па проучување на процесот на плисирање и на крајот финалната реализација на парчињата.
Зошто баш уметничко ателје, која беше инспирацијата за ваков амбиент?
Моите колекции се секогаш поврзани со одредена приказна, која подоцна ја раскажувам и преку едиторијалот што со креативниот тим го изготвуваме за нивна презентација. Бидејќи главна инспирација овој пат ми беше ликовната уметност, а како лајтмотив е пресликана и на дезените на парчињата, со фотографката Александра Костадиновска се согласивме дека ателјето е „најприроден“ амбиент за оживување на креациите. Во улогата на игрива девојка што со четката в раце и боите ги искажува најдлабоките емоции, вешто се снајде манекенката Фројла Брестовци. За шминката беше задолжен Виктор Мирчевски, за фризурата Дарко Петковски од „Hairhouse“, а чевлите беа од marwell.mk.
Каде можат да се најдат парчињата од твојата последна колекција и за какви девојки се тие наменети?
Парчињата од колекцијата се „обоени“ во пастелни нијанси, а изработени од лесни и плисирани материјали.
Сите љубителки на нежните бои, слободните и лелеави кроеви може да ме посетат во моето ателје и одблизу да ги погледнат и да ги пробаат.
Фотографии: Александра Костадиновска
