Колку често додека одите да завршите некоја работа низ центарот на градот гледате бездомни лица? Колку сме бесчувствителни за тие сценарија на кои секојдневно сме сведоци? Дали ако дадеме 10 денари ќе помогнеме или може да се направи нешто посуштинско?
Темата бездомништво е актуелна низ целиот свет. Причините една личност да стане бездомник можат да бидат најразлични и може да му се случи секому. Дизајнерите и архитектите креираат секакви решенија што би можеле да им го олеснат животот на бездомниците.
Овој предлог-концепт користи корпа од супермаркет и најлон; тоа се материјали што можат да се најдат на улица, а од кои може да се изгради засолниште.
Друг интересен пример е овој расклоплив предмет што би можел да им биде дониран на бездомниците и кој тие би го носеле со себе, а по потреба можат да го отворат за да преспијат.
Најинтересна од сите е идејата на словачкото архитектонско студио Designdevelop, кои имаат замислено да создадат дом за бездомници на секој билборд. Финансирањето за одржувањето на домот би било од спонзорираните реклами, а исто така би се користел и дотокот на електрична енергија. Оваа идеја е многу интересен спој на маркетингот и социјалната работа и тука маркетингот добива социјална функција, што во суштина треба да биде и иднината на рекламирањето на брендовите.
Но дали само засолниште им е потребно на бездомните лица? Во Рим папата Франциско во соработка со брендот Whirpool отворија простории со машини за перење, каде што бездомниците ќе можат да си ги исперат алиштата. Исто така, некои фризери во Италија одлучиле еден ден од месецот да работат беспари за бездомниците. Овие фризери се многу поценети од другите заради социјалната работа.
Иницијативата Hang Up Help Out циркулира низ целиот свет, каде што на хартиени закачалки можете да обесите алишта што не ви требаат и бездомните лица можат да ги земат.
Во Лондон се поставуваат фрижидери наречени People Fridges, каде што компаниите и луѓето што имаат храна што им останала, а е близу до истекот на рокот, ја оставаат во овие фрижидери и бездомниците можат да ја користат.
Во Скопје веќе четири години постои иницијативата „Ретвитни оброк“, која организира групно готвење оброци за бездомните лица. Нивните настани се дружељубиви и докажуваат дека сочувството за бездомните лица постои и кај нас. Оваа прекрасна иницијатива треба да биде почеток за многу поголема ангажираност на сите луѓе околу ова важно прашање, вклучувајќи иновативни и креативни решенија, како и активна вклученост на бизнис-секторот.
Сара Симоска,
архитект
