Главната награда на фестивалот, Златна мечка за најдобар филм, ја врачи Шјамалан. „За неговите извонредни изведби, од деца актери до актерите во нивните 80-ти, за способноста да се прикаже нежноста, комедијата и борбата“, тој ја награди шпанската драма „Алкарас“ на режисерката Карла Симон.
Сместен во околината на Алкарас, надвор од Леида, западна Каталонија, „Алкарас“ ја следи приказната за кланот Соле, големо, тесно поврзано семејство, кое го поминува летото берејќи праски во својот овоштарник во едно мало село.
Но, кога им се заканува иселување поради новите планови за земјата, кои вклучуваат сечење на праските и поставување соларни панели, членовите на семејството почнуваат да се оддалечуваат. „Variety“ го нарече „прекрасна, слатко-слатка земјоделска драма“, пофалувајќи го „топлиот афинитет на Симон кон овој наизменично исушен и зелен пејзаж“.
Жителите на Алкарас не го пропуштија овој значаен момент имајќи предвид дека многумина од нив беа избрани како аматери во филмот. Локалните власти од малото каталонско место исто така присуствуваа на настанот на црвениот тепих во културниот центар „Lo Casino“, во кој беше одржана церемонијата на доделувањето на наградите. Актерите што допатуваа во Берлин беа дочекани со силен аплауз од публиката, која со очекување чекаше да ја дознае судбината на филмот на фестивалот.
Кога беше објавена наградата за најдобар филм, толпата што се собра во „Lo Casino“ беше егзалтирана од радост и солзи, а тој момент сигурно ќе влезе во историјата на Алкарас.
Берлинале сега е трет по ред голем европски филмски фестивал што ја доделува својата главна награда на жена режисер, по Кан и Венеција минатата година. „Чувствувам дека треба да се преселам овде, бидејќи секогаш кога доаѓам, се случува нешто неверојатно“, рече Симон при примањето на наградата. Во 2017 година таа освои две награди за нејзиниот филм „Лето 1993“.
Режисерката Клер Дени ја доби наградата за најдобар режисер за нејзината романтична психодрама „Двете страни на сечилото“ – или „Оган“, како што е позната во САД. Жулиет Бинош ја толкува улогата на радионовинарка по име Сара. На почетокот на филмот ја гледаме во незаборавна океанска сцена со нејзиниот сопруг Жан (Винсент Линдон), кој сè уште бара работа откако е пуштен од затвор пред некое време. Еден погрешен поглед на нејзиното поранешно момче Франсоа (Грегоар Колин) и неговата многу помлада нова девојка (Лола Кретон) е доволен Сара да се почувствува разнишано и да се впушти во опасен љубовен триаголник.
Извонредниот корејски режисер Хонг Санг-су ја доби Големата награда на жирито Сребрена мечка за неговиот најнов филм „Филмот на романсиерот“. „Продолжувам да го правам она што го правев“, рече изненадениот победник. Режирал дваесетина филмови во текот на својата кариера. Корејскиот режисер се враќа од фестивалот со награда трета година по ред. Хонг освои Сребрена мечка за најдобар режисер на Берлинале во 2020 година за филмот „Жената која избега“ и ја доби наградата за најдобро сценарио за „Вовед“ во 2021 година.
„Филмот за романсиерката“, во кој главните улоги ги толкуваат Ли Хје-јанг и Ким Мин-хи, ја раскажува приказната за позната романсиерка, која се среќава со позната актерка што порано ја познавала. Тие поминуваат време заедно разговарајќи за нејзината закочена креативност и снимање филмови. Романсиерката е заглавена во својата писателска блокада и размислува да сними филм. Хонг го напишал сценариото и го режирал, го снимил и го монтирал овој филм.
Драган А.
