За својата инсталација „Клучот во раката“ („The Key In The Hand“) на Венециското биенале во 2015 година, Чихару Шиота го наполни јапонскиот павилјон со лавиринтска мрежа од црвено предиво, од подот па до врвот. 55 илјади клучеви собирани од сопственици на домови ширум светот висеа закачени како презреани плодови подготвени да паднат во секој момент. Овој извонреден проект е типичен за уметницата од Осака која поврзува различни предмети во своите дела: обувки, кревети, куфери – олицетворение на интимните човечки искуства, емоции и нивните изгубени аспекти. За Шиота, мрежата од клучеви го претставува универзалниот копнеж за создавање дом и сеќавања.
За 20-то Биенале во Сиднеј во 2016, Чихару Шиота го создаде проектот „Свесно спиење“ („Conscious Sleep“), инсталација од вертикални кревети испреплетени во црно предиво – асоцијација на затворениците што спиеле во колонијалниот затвор на островот Кокату. Таа прави конекција меѓу обичните, сакрални предмети во животот кои се заплеткани во емоциите и личните патувања што ги пренесува преку инсталациите. Нејзините дела се сметаат за феноменолошки средби, ангажирајќи ја публиката што се движи низ просторот. Токму публиката ги надополнува неверојатните инсталации на Чихару Шиота и ги комплетира во вистински уметнички дела.
