По долги години на хардкор/панк сцената, Fitz (The Beginnings/Noviot Pochetok; Sixtynine Records, Zemjotres), вели дека се чувствува како да излегува повторно од гаража. Во моментов работи како unsigned, indie & DIY артист, па пред извесно време го објави новото издание WOLVES под нов псевдоним „BLACKSTATE“. Кога го прашавме што понесе како искуство од досегашната работа, Fitz ни рече:
„Во принцип, чепкам електроники исто колку што ми е стар и бендот. Всушност, кога ќе размислам, би рекол и од многу порано, затоа што сум geek израснат на компјутер, па така FL Studio (тогаш Fruity Loops), на пример, го работам уште од верзија 2.0. На уште помала возраст правев и mixtapes со megamixes, секако комбинирајќи од цедеа и снимајќи на касети. Во еден момент бунтовноста на хардкор панкот ми го тргна целото внимание од електрониките, па сега е сосема логично и најдобро време (кога рокенролот е во некаква пауза) да се вратам на тоа и да експериментирам. Токму така и решив да излезам од гаража сега, во 2019. Искуството од хардкор панк би рекол е дека мораш да одиш и да свириш. Нема друг начин. Токму и тоа ми е целиот фокус сега. Да спремам сет и да го свирам live. Во меѓувреме, првпат пробувам и поинаку (онлајн), но гледам дека е прилично зафркнато 🙂 Има премногу информации. Никој не е доволно битен. Со чест на исклучоци.“
На новиот проект работел повеќе години, но поактивно во последниве две. Засега вели дека му е во план да објавува синглови, без да си врши притисок. Веќе има костури за неколку нови проекти, кои ќе ги дотерува и објавува еден по еден. Во врска со тоа, Fitz односно BLACKSTATE вели:
„Кога ќе се соберат повеќе, дефинитивно може да излезе првото EP. И така натаму. Се чувствувам најдобро ever, бидејќи сум нов, излегувам од гаража во моментов и сум во фаза на reinventing myself.“
