На бадниковата вечер во Цанкарјев дом во Љубљана се промовираше албумот „Čaralice“ на словенечката авторка Звездана Новаковиќ и нејзините хористки.
Создавањето на овој албум е резултат на истражувањето што Новаковиќ го направила низ документацијата за словенските пагани што живееле во Словенија, нивните обичаи, молитви, магии и сѐ што го сочинувал нивниот однос кон природата.
Во брошурата што го придружува албумот пишува: „За помалку од еден век, човекот придонесе кон уништувањето на многу видови и ја доведе Земјата на работ од еколошка катастрофа. Ние живееме на Земјата, но се чини дека не ја слушаме! Нашите предци мудро учествувале во нејзиниот животен циклус, поврзувајќи се со него низ песни и обичаи.“
Една од песните на албумот е молитва за Дажбог, словенски бог на сонцето, дождот и на подземниот свет. Тој е бог што дава живот (топлина и влага). Ова е една од двете песни од овој албум што во моментов се достапни онлајн и која ја отсликува мисијата на неговата авторка:
„Проектот ‘Čaralice’ е во чест на словенечките пагани, кои ја почитувале природата и живееле со неа. Овие песни отсликуваат свет во кој човештвото е понизно кон своето место во универзумот, изразувајќи ја својата одговорност кон неговото постоење низ зборови и дела.“
Засега албумот можете само да го нарачате преку директен контакт со авторката преку социјалните мрежи, но се надеваме дека наскоро ќе можете да го чуете на стриминг-платформите или во живо (стискаме палци!).
