Squid Game
Веќе сите добро ја знаете Squid Game. Можеби не требаше да се најде на списокот бидејќи е добро позната, но сепак оваа серија продуцирана во Кореја успеа да го задржи светското внимание, и токму затоа ја вклучивме. Стотици очајни луѓе во потрага по пари ќе бидат вклучени во натпревар, во кој можат да заработат доволно пари никогаш повеќе да не се грижат за своите долгови. Сè што треба да направат за да го освојат џекпотот е да ги комплетираат сите шест детски игри што се дел од натпреварот. Но не е едноставно како што звучи бидејќи игрите имаат пресврт што може да ги доведе до смрт. Она што ја карактеризира оваа серија е мрачната бруталност која е преинтензивна и не одговара на сечиј вкус. Доколку сè уште не сте ѝ дале шанса, обидете се. 😊
Bo Burnham: Inside
Интересен special што прави осврт на месеците што целиот свет ги помина во локдаун. Доброто музичко документирање на пандемијата е поддржано и од актерската игра на американскиот музичар и комичар Бо Бурнхам, кој воедно се јавува и како автор на оваа серија. Доколку мислите дека веќе ментално сте закрепнале од она што го преживеавме изминатата година, слободно можете да си ја пуштите оваа серија што ќе ве потсети на хистеричните моменти на изолација, анксиозност и „пиење кафе на интернет“.
Midnight Mass
Ако ви се влегува во натприродното, дајте ѝ шанса на оваа серија. Дејството се фокусира на заедница на изолиран остров што ќе започне да сведочи натприродни настани по пристигнувањето на еден мистериозен свештеник. За кратко време, жителите на островот ќе доживеат необјасниви трансформации. Една постара жена ќе започне да се подмладува и да заздравува од деменција, парализирано девојче одненадеж ќе прооди… Оваа серија со набиено дејство ќе ве остави со многу прашања и малку одговори. Но, тоа не е причина да не се одлучите да ја ставите на списокот за бинџање.
https://www.youtube.com/watch?v=y-XIRcjf3l4
Mare of Easttown
Оваа серија е нешто повеќе од обична детективска „боза“. Главниот лик што го толкува Кејт Винслет се обидува да го заборави своето проблематично минато, а како што се очекува од актерска големина како Винслет, таа и актерите во споредна улога донесуваат врвна актерска игра. Серијата ја истражува темната страна на малото пенсилваниско гратче и нуди вистински добра вивисекција на тоа како семејството и трагедиите во минатото можат да го одредат правецот во кој ќе се движи иднината.
Maid
Оваа серија е инспирирана од мемоарите на Стефани Ланд, а во неа станува збор за Алекс, млада мајка што заедно со својата тригодишна ќерка ќе побегне од насилна врска и ќе заврши како хигиеничарка, која никогаш не заработува доволно за да си ги плати трошоците. Во исто време, таа бара живеалиште, се справува со бирократските процедури, се бори за старателството над ќерка ѝ и се грижи за својата мајка која има ментална болест. Ако сте подготвени за серија што не е лесна за гледање и варење и која се занимава со вистинските проблеми, тогаш ова е вистински избор за вас.
Драган А.
