Vienna design week: Домашна дизајн сцена со фокус на современ фински дизајн

Во центар на интерес е домашната сцена, дизајн на производ, мебел, индустриски дизајн, архитектура, графички и социјален дизајн, како и експериментални и дигитални пристапи, а целта е локалниот потенцијал да се препознае, вмрежи и да се промовира интернационално. Годинава специјален простор е посветен на Финска, како земја гостин со многуслојна историја на дизајн, а современ фински дизајн се прикажува на изложбата Wild at Heart.

Типично за фестивалот покрај многубројните локации е што секоја година се менува главното седиште и се прави осврт на различен кварт од градот. Овој пат тоа е областа Alsergrund, северно од стариот, централен дел на Виена, со карактеристични широки улици и елегантни градби од крајот на 19 век. Некогаш негова одредница биле занаетите што се одвивале во него, изработка на кочии, производство на порцелан и печатарство, подоцна станува препознатлив како еврејски кварт, по домот на Зигмунд Фројд, студентскиот кампус и пабови, гнездо на студенти и ЛГБТ-заедницата. Денес во оваа населба се развива најголемиот урбанистички проект на градот, Althan Quartier, каде што воедно е и главната фестивалска сцена на design week.

Во програмата што опфаќа изложби, презентација на продукти, работилници, тури низ градот и разговори, дизајнот се ужива од различни перспективи. Може да се сведочи уникатно производство на продукт на специфични локации, да се учествува во истражувачки и експериментални проекти, како и да се следи во живо процесот на работа на дизајнери.




Урбана храна и дизајн е значајна тема веќе втора година на design week, која го засега дизајнот во процесите на продукција транспорт и маркетинг. Возбудливо мултисензорно гастрономско искуство на консумирање храна претставува The chromatic dinner, спој на западен дизајн и источна философија. Оваа презентација по неколку светски дестинации за првпат е возможно да се доживее токму на овој фестивал во Виена.





Анна