Албумот вклучува и гости, од познатиот македонски џез-гитарист Тони Китановски и легендарниот американски басист Мајк Ват („Ништо нема да нè раздели“), раперот Волк Македонски („НАТО влегува во Скопје“), електронскиот продуцент Стојче („Злобен фанк“) и Александар Ниниќ, до Вилијам Бараковски („Ретки билки“, „Дојде живот“).
Следејќи го патот започнат со „Политика“ (Moonlee Records, 2016), ова ново издание е продолжение на нивниот стремеж за активна политичка опсервација врз прашања какви што се граѓанската непослушност и човечките права. Албумот ги обединува влијанијата на пост-панкот од доцните 70-ти и раните 80-ти, њу вејвот, алтернативниот рок, Детроит електрото и балканската фолк-музика. Централниот денс-панк и електро-грувот се комбинираат со минималистички бас-рифови, пулсирачки синт и се разбира, волшебниот глас и лириките на Кристина. Сето тоа резултира со разиграна музичка мешавина и силен одек на протестирачки химни.
Текстовите, се разбира, се социјален коментар, кој нуди перспектива во македонската политика и секојдневието, како и во внатрешните битки што произлегуваат од општествените судири и ги трујат личните односи. Критиката вели дека „Bernays Propaganda“ отсекогаш биле бенд што го третирал општеството, па оттаму во овој албум тие успеваат да ја наметнат темата на политичкото и домашното насилство како две страни од истиот медалјон. Светот е загаден од штетни убедувања и болни идеологии, но сепак во него сè уште растат ретки цветови.
