Бендот доаѓа од Венеција и е формиран во 2008 година. Критиката е едногласна и ќе каже дека: Фернандо Нути – вокал и гитара, Андреа Волпато – гитара, Алесандро Боскиеро – бас и Дарио Лучези – тапани и перкусии, особено се силни во нивните живи изведби и прават фантастична концертна атмосфера.
Нивниот прв студиски албум „Stars Reach The Abyss“ го објавија во 2012 година, а продуциран од влијателниот британски продуцент Џон Астли, ги однесе на турнеја низ Англија и Италија. Песната „Meltdown Corp.“ беше вклучена во годишната компилација „The Reverb Conspiracy“. Вториот албум го издадоа во 2015 под наслов „As Medicine“ кој го однесе бендот три пати на турнеја низ Европа, а турнеите продолжуваат и со третиот и последниот албум „Bleeding Magenta“ издаден во 2017. Изминативе неколку години, „New Candys“ ги освоија и Австралија, САД и Мексико. Некои од нивните песни се искористени во познатата американска ТВ серија на „Showtime Networks“ – „Shameless“.
Домашна поддршка на „New Candys“ ќе бидат фантастичните „Beam Experiment“! Станува збор за свеж, експериментален рок-состав од Скопје, кој негува неограничени музички форми, и со импровизирање го развива творечкиот процес кој резултира со нивниот уникатен соничен израз.
