Илустрациите на Бранкица Јордановска го отвораат порталот кон имагинарниот свет на театарот и циркуската игривост, покажувајќи ја моќта на маската да се соедини со својот носител и да создаде нов, препознатлив лик кој долго ќе ви се провлекува во стварноста. Она што сцената ѝ го дава како на гледач, Бранкица умее да го впие во својата уметност и да ѝ го врати назад, со тоа станувајќи обликувач на сценската игра. За својата работа, таа вели:
„За мене илустрацијата е начин на изразување и раскажување на една лична приказна. Во речиси секое дело настојувам да преплетам една своја интимна игра со процесот на креирање, а воедно да ги искажам своите визии на еден посебен медиум како илустрацијата. Навикнати сме да ги изразуваме своите мисли со зборови и реченици, меѓутоа сликата претставува еден поразличен израз во кој истите симултано се преведуваат во линии и бои и добиваат еден сосема поинаков тон. Инспирацијата најчесто ја црпам од циркусот, театарот, маските и костимот кои ги сметам за еднакво сродни со ликовната уметност. Работејќи во секторот на костимографијата и сценографијата, за мене е сосема нормално да позајмувам и си поигрувам со мотиви од таа околина, а она што најмногу ме привлекува се изопаченоста и несекојдневноста на маската и костимот. Оттаму, моите илустрации ја носат истата тенденција да ја пренесат атмосферата, бојата и емоцијата на отворената сцена и нејзината исклучителна природа.“
