Почнува сезоната на најочекуваните светски музички фестивали. Драјвот за добра журка го ставаме на макс, ги пакуваме ранците и одиме таму каде што се слуша добра гласна музика.
Coachella — САД
Штом се спомнува Coachella (Coachella Valley Music and Arts Festival), инстант-реакцијата ти е силен флеш (Let the sunshine in) и со мислите веќе си во истоимената долина во јужна Калифорнија, уживаш во одличниот звук и во интензивната забава зачинета со холивудски гламур и имиња од самиот врв на светската музичка сцена. Рок, инди-поп, хип-хоп, електроника, денс, техно, арт-инсталации, скулптури, сето тоа е распослано на неколку сцени и претворено во вистинска парада на уметноста и слободоумноста. Овој фестивал е трендсетер во музиката и синоним за модата. Посетителите носат еклектични комбинации на бои и материјали, често со етнички и домороден предзнак.
[URIS id=617]
Од 1999 година, на фестивалските сцени на Коачела настапувале голем број познати светски бендови и изведувачи: AC/DC, Amy Winehouse, Prince, Paul McCartney, Snoop Dog, Doctor Dre, Daft Punk, Radiohead, Madonna, Kanye West, Eminem, Jay-Z, Red Hot Chili Peppers, Gorillaz, итн… Инспириран од легендарниот Woodstock, фестивалот на музиката и уметноста Coachella веќе 18 години се труди да ја продолжи традицијата и културата од шеесеттите години на минатиот век. И одлично го прави тоа! Coachella секоја година привлекува илјадници посетители што ги поставуваат своите шатори и во целост ја живеат хипи-идејата, барем за време на тие неколку априлски денови колку што траат фестивалските случувања.
И сега, сигурно ќе се запрашате: Колку тони ѓубре оставаат зад себе? 🙂 Околу 600 вработени лица постојано го чистат теренот и сите отпадоци се рециклираат. Освен тоа, Coachella постојано воведува иницијативи за зачувување на природата! На пример, фестивалските уметници дизајнираат канти за рециклирање, кои се поставени насекаде на фестивалскиот терен. Интересна акција е воведувањето натпревар со главна награда - доживотна ВИП-карта за оние посетители што доаѓаат групно со еден автомобил. Последното издание на Coachella го посетиле 250.000 луѓе, а обезбедило приходи од неверојатни 114,6 милиони долари. Главни изведувачи на овогодишното издание на Coachella ќе бидат: The Weeknd, Beyoncé и Eminem. Освен нив, ќе се појават и: Cardi B, St. Vincent, Haim, Angel Olsen, War on Drugs, alt-J, Jamiroquai… Coachella ќе се одржи во текот на двата викенда од 13 до 15 и од 20 до 22 април.
Coachella epic moment: Во 2012, Tupac Shakur излегува на сцената, ја поздравува публиката со: „What the f*** is up, Coachella!?!“ (иако фестивалот не постоел додека бил жив) и им се придружува на Snoop Dog и Dr. Dre. Извонредно изработениот холограм на починатиот рапер барем за 5 неверојатни минути го врати меѓу живите и ја донесе атмосферата во публиката до точка на вриење.
Еxit — Србија
Од обична студентска идеја во слабата поствоена Србија, до катарзично фестивалско искуство што обединува илјадници млади луѓе од регионот и пошироко! WoW! Зошто? Затоа што на западњаците веројатно никогаш нема да им стане јасно колку е тешко да се спроведе ваква идеја на нашите простори, да се одржи фестивалската традиција и притоа постојано да расте и да се развива. Егзит (Еxit) — големиот излез од кризите, ембаргата и омразата што со години го тресеа регионот. Триумф на уметноста, забавата, младоста!
Фестивалот што секое лето се одржува на Петроварадинската тврдина во Нови Сад досега има примено повеќе од два милиона посетители од 60 земји низ светот. Си-ен-ен и „Њујорк тајмс“ го прогласија за еден од најдобрите десет музички фестивали во светот. На неколкуте негови сцени (Main Stage, Dance Arena, Explosive Stage, Fusion Stage) имаат настапувано имиња како: Pet Shop Boys, Morrissey, Billy Idol, Guns N’ Roses, Franz Ferdinand, Motörhead, Stereo MC’s, Iggy Pop, Massive Attack, Faithless, Garbage, Goldfrapp, The Cardigans, Beastie Boys, Snoop Dogg, Wu-Tang Clan, The Prodigy, Sex Pistols, Kraftwerk, Lily Allen, Korn, Moby, Manic Street Preachers, Patti Smith, Manu Chao, Placebo, Klaxons, Gloria Gaynor, Nick Cave and The Bad Seeds, Jamiroquai, Hurts, Skrillex, Stromae, Emeli Sande, Roisin Murphy, Moloko, Ellie Goulding, Years & Years… Листата е огромна. Exit e еден од ретките европски фестивали на кои настаните започнуваат доцна во ноќта, а публиката ги дочекува најпознатите светски изведувачи рано наутро. Забавата е луда, а концертите и настапите во амбиентот на средновековната тврдина — неверојатни!
[URIS id=628]
Exit и годинава е прогласен за најдобар европски фестивал на Европските фестивалски награди во Холандија, вo конкуренција од 350 фестивали од целиот свет. 2018 ќе биде посебна за овој музички фестивал затоа што го лансира проектот Exit Freedom 2018, кој го сочинуваат пет фестивали од пет земји. Предводени од Exit, ќе се редат: Festival 84 на Јахорина, Sea Star во Умаг, Revolution во Темишвар, и на самиот крај на летото — Sea Dance на црногорското приморје. Поставата на Exit 2018 ветува многу. Веста за настапот на легендарната Grace Jones одекна силно во регионот и ширум Европа. Најавени се и: David Guetta, Fever Ray, LP, Ziggy Marley, Adam Beyer B2B Ida Engberg, Amelie Lens, Ben Klock, LP, Anastasia Kristensen, DJ Jock, Duśan Nikolic B2B Runy, Richie Hawtin, Alice Merton, Burak Yeter, Jax Jones, Ofenbach, Mahmut Orhan и многу други. Се гледаме на Петроварадинската тврдина од 12 до 15 јули! 🙂 Way to go, Exit! 🙂
Exit epic moment: Настапот на Roisin Murphy на Exit 2017. Големи фанови на Moloko сме 🙂
Tomorrowland – Белгија
Влезниците за овој музички фестивал на електронска музика се распродаваат за неколку минути. Околу 2 милиона фанови на Тумороуленд (Tomorrowland) секоја година се обидуваат да дојдат до влезници. Во тоа успеваат само четвртина од нив :). На главната страница на официјалниот вебсајт ќе ја прочитате пораката: „Ние сме луѓето на утрешнината. Веруваме дека животот може да се ужива во целост, без да се прават компромиси. Ние сме одговорни за генерацијата што ќе дојде утре, за меѓусебната почит и за почитта кон Мајката Природа.“ Првпат се одржал во 2005 година, а денес важи за еден од најголемите и најдобри музички фестивали во светот. Секоја година, два викенда по ред, во местото со експлозивно име Boom (не толку експлозивно на холандски, холандскиот изговор на името е Бом 🙂 ), Tomorrowland ги собира најдобрите светски диџеи. Овој фестивал се одржува на езерца опкружени со шума и водопади, а импресивните стејџови се декорирани така што ќе помислите дека магично сте се телепортирале во некоја од бајките на Ханс Кристијан Андерсен. Замислете, има дури и пловечки стејџови на кои се доаѓа само со брод. И наместо традиционалните хартиени конфети, хеликоптерите на Tomorrowland истураат ливчиња од роза врз публиката. Мирисот? Можете да си претпоставите, како во бајките на Андерсен 🙂 Минатата 2017 година, на Tomorrowland се журкале 400.000 луѓе од целиот свет. Досега на овој фестивал свои сетови имале: Armin van Buuren, Paul van Dyk, Magnus, Moby, David Guetta, Faithless, Carl Cox, Steve Angello, Axwell, Tiësto, Afrojack, Avicii, Marco Bailey, Shameboy, Sash! и многу, многу други. Интересно е тоа што во 2013 година започна да се организира и американската верзија на овој фестивал наречена TomorrowWorld.
[URIS id=636]
Фестивалот Tomorrowland се одликува со перфектна продукција, совршена организација, незаборавно доживување што изобилува со бои, шаренила, насмеани и разиграни луѓе, и што е најважно – убава енергија! Првиот фестивалски викенд оваа година е на 20, 21 и 22, а вториот на 27, 28 и 29 јули. Поставата ги вклучува: Alan Walker, Axwell /\ Ingrosso, Bonzai All Stars, Carl Cox, Charlotte de Witte, Hardwell, Armin van Buuren, Underworld…
Тomorrowland epic moment: Во 2013, Armin van Buuren ја сподели веста за раѓањето на својот син со целата публика на Tomorrowland. Моментот со солзите во неговите очи и екстазата во публиката – ежење 🙂
