„Здраво млади“ во саботата успешно и квалитетно го озвучи урбаното Скопје, снабдувајќи го со толку потребниот енергетски набој за претстојните стандардни битки што ги носи есенско-зимскиот период во градот (какви што се оние со контаминираниот културен простор и загадениот воздух, да речеме). Вистинско освежување во вистинско време, внимателно нијансирана и сеопфатна фестивалска програма што упати поздрав до најмладите млади, средно младите, повозрасните млади и вечно младите, на четири различни, но еднакво вибрантни сцени.
Осмото издание на „Здраво млади“ започна со јуниорската програма, продолжи со извонредната хип-хоп варијанта на легендарната драма на Чашуле „Црнила ремикс“, настапите на Flohio, Repetitor, Blanck Mass и кулминираше веројатно со најочекуваниот концерт на фестивалот – оној на њујоршкиот амбиент-поп бенд Cigarettes after sex.
Дел од настапот на Flohio
Во една фантастично унисона атмосфера, фронтменот на dream-поп сензацијата Greg Gonzalez ги најавуваше изведбите со својот длабок разговорен глас, кој потоа на воодушевување на публиката се трансформираше во мекиот андрогин вокал од препознатливите парчиња „Affection“, „Please don’t cry“, „Apocalypse“… Публиката имаше можност до доцните ноќни часови да ги посетува различните сцени и да се насладува во шареноликиот избор на нова музика (Палиндром, Wooden Shjips, Camera, Dj Fitz, Eric Copeland итн…), чија презентација и афирмирање воедно е и главното мото на фестивалот.
Дел од атмосферата на концертот на Cigarettes After Sex
Фактот што „Здраво млади“ воспостави културна „папочна врвца“ со урбаното јадро на Скопје, воопшто не е случаен. Таа се должи на внимателната програмска селекција, огромниот корпус на искуство и музичка поткованост, професионалната работа и посветеноста во подготовките на секое од изминатите осум фестивалски изданија. Таа врвца можеби физички се протега на магичниот простор меѓу брегот на Вардар и објектот на МКЦ, но нејзиниот културен дострел заслужува и мора да се протега многу пошироко.
