„Портрет на Британија“ е годишна изложба на фотографии што ги прикажува најдобрите портрети на луѓе фотографирани ширум целото Обединето Кралство. Наградените фотографии потоа се објавуваат на дигитални билборд-екрани низ земјата – на железничките станици, аеродромите, трговските центри, при што можат да бидат видени од повеќе од 10 милиони луѓе. „Портрет на Британија“ се организира по третпат, а годинешната изложба беше поставена на 1 септември и за првпат е придружена со книга, која содржи 200 фотографии од потесниот избор, информации за секоја од нив, како и одбрани цитати од фотографите. Овие фотографии ги слават различноста и шаренилото на енергичната британска нација токму во периодот кога ѝ се случуваат крупни историски промени.
„Портрет на Британија“ е јавна уметност од големи размери – национална изложба што го става граѓанинот во јавниот простор соочувајќи ја јавноста со својот сопствен одраз додека ги завршува секојдневните обврски. „Позајмени“ од сите сфери на живеењето, овие луѓе го делат истиот простор со оние што ги гледаат пред екраните.
„Случајно го сретнав овој млад пар и ги фотографирав во серија за променетото лице на Фолкстоун“ – Sea Change Part 8 © Lee Brodhurst – Hooper
Zandra © Curtis Gibson
„Овие католички девојчиња позираат со својата сакана дадилка – муслиманка. Сакав да го прикажам блискиот однос меѓу нив, и покрај разликите во возраста, националноста и верата“ – Ties © Alexandra Adami
„Ја забележав Рокси во забавниот парк Дримленд. Носеше убиствена гардероба. Кратко поразговаравме за нејзиниот фустан, а потоа беше среќна што ја фотографирав“ – Roxy Gore © Joe Lang
„Асма, член на муслиманскиот кошаркарски тим, фотографирана со други членки на тимот. Тие се дел од светска кампања, со која бараат од Меѓународната кошаркарска федерација да ја укине забраната за носење верски обележја на дресовите“ – Asma © Sophie Green
„Диран е британски писател што напиша интересен роман за млад црнец што студира на Оксфорд. Го направив овој портрет на Диран, кој и самиот е студент на Оксфорд, како дел од иницијативата да се охрабрат сите млади луѓе (а не само мажите белци) да аплицираат за студии на овој универзитет“- Diran Adebayo in front of a portrait of Sir Christopher Wren ( An Ordinary Commoner) Oxford © Rory Carnegie
„Кога медиумите постојано ви кажуваат дека нацијата е исправена пред неизвесна иднина, едноставно понекогаш треба да се насмеете. Овде Шенон беше изненадена од едно мало кученце, старо само девет недели“ – Shannon © Samuel McElwee
„Даниел (лево) патувал од Нигерија до северозападна Шкотска за да си го исполни својот сон да работи како поморски биолог. Ова е еден од најдивите и највлажни делови на Британија, но и покрај тоа, тој се заљубил во оваа област и решил да остане овде“ – Night Watch at Salmon Farm © Euan Myles
„Ја фотографирав Мао, моја поранешена студентка од Јапонија, за проект што истражува како видот, допирот и проприоцепцијата се комбинираат за да создадат убедување дека го поседуваме телото и ја разбираме реалноста во која живееме“ – Mao © Steven Barritt
„Нан е родена со албинизам. Ми стана муза“ – In the Job Centre © Andrea Zvadova
