Клубот „Епицентар“ ја бележи својата втора летна сезона отворајќи ги вратите за своите посетители дури од 16 мај, правејќи уникатно отворање со еден од најбараните и версатилните аргентински продуценти, Guti. Концептот и програмата што ги нуди клубот „Епицентар“ се наменети за широк спектар посетители и музички сладокусци, односно почнувајќи од среда па сѐ до крајот на викендот, може да уживате во различен стил на музика. Програмата на клубот се отвора со Audiobahn, што претставува концепт што го преводи младиот Бодан Јамакоски, чија цел е да презентира разновидна музика, т.е. гости преку пренос на нивниот настап во живо, односно на нивната фејсбук-страница. Настанот е со почеток од 19:00 часот и трае сѐ до раните утрински часови.
Четвртоците се резервирани за екипата на SureShotz односно Панчо а.к.а. Dj Shorty P и Irie Scratch, додека во петок и во сабота имаме гостување на резидент-диџеите на „Епицентар“, односно странски изведувачи во зависност од нивниот закажан термин.
Во склоп на агендата на клубот „Епицентар“, ќе ја имаме можноста за првпат да го проследиме настапот на холандскиот диџеј и продуцент Tom Trago, за кого има многу што да се зборува и да се напомене. Неговите почетоци во музиката се од 15-годишна возраст кога си ја зема улогата на музички селектор презентирајќи си сам на себе селекции од музичката колекција на неговите родители, во импровизирано радиско шоу. Растејќи со разновиден поглед кон музиката и со голема љубов спрема неа, изборот да се занимава со музика е доста логичен и очекуван. Низ годините како музички продуцент успешно го имплементира сето она што му има оставено впечаток во неговата музичка едукација и созревање, па така често може да се забележи и да се препознае влијание од повеќе жанрови какви што се џез, диско, фанк и сл. во неговите изданија. Зад себе досега има четири албуми, кои уживаат доста солидни критики и статус меѓу вистинските музички познавачи, критичари и секако диџеи. Кога станува збор за неговите гостувања и настапи како диџеј, Tom Trago не може да се смести само во еден жанр, туку има интересен концептуален настап каде што музиката претставува патување низ повеќе стилови какви што се хаус, диско, Детроит техно итн. Интересот за неговите настапи и сетови низ светот е голем судејќи по неговата агенда, па така што можеме да се чувствуваме почестени со гостувањето на 15 јуни во клубот „Епицентар“.
Гостувањето на Tom Trago ни го овозможува новопоставената музичка платформа PopUp Music, која досега успешно реализираше повеќе проекти, односно концептуални забави на различни локации низ Скопје („Синдикат“, „Јавна соба“, „Радио бар“, „Кино Карпош“). Доколку не сте биле, или, пак, не сте успеале да ги посетите, може да се каже дека сте пропуштиле добро дружење, т.е. забава придружена со квалитетна музика, која ни ја презентираат искусни странски и регионални диџеи, кои се веќе синоним кај нас за добра журка и внимателно избрана музика за забава.
2006 – Live With The BBQ (debut single)
2009 – Voyage Direct (debut album)
2011 – Iris (second album)
2011 – Night Voyage Tool Kit (ep with Bok Bok)
2012 – Use Me Again (And Again) (single)
2013 – Time (single with Subb-an & Seth Troxler)
2013 – The Light Fantastic (third album)
2015 – Hidden Heart of Gold (single)
2015 – Brutal Romance (single)
2015 – De Natte Cel (single with Seth Troxler)
2018 – Bergen (fourth album)
Ремикси: Erol Alkan, Franz Ferdinand, Freeform Five feat. Roisin Murphy, George Morel, Jacques Renault, Juju & Jordash, New Order, Tiga, Wulf ‘N’ Bear.
Соработувал со: Awanto 3, Bok Bok, Cinnaman, Om’mas Keith, Romanthony, San Proper, Steffi, Seth Troxler, Tyree Cooper, Young Marco.
Нино Делиниколов
