Рекол: „Уметноста не се создава за никого, а истовремено се создава за сите“. Само најголемите уметници низ историјата, преку својата работа успеваат да се трансформираат во неисцрпен извор на инспирација за развој на понатамошни идеи и нови револуционерни правци. Пит Мондријан е несомнено еден од нив. За почеток, ако сакате лично да се сретнете со неговата уметност, можеби најблиската локација што треба да ја посетите е последниот кат од Народниот музеј во Белград, каде што е изложено неговото познато апстрактно дело „Композиција со црвена, сина и жолта“.
„Емоцијата на убавината секогаш е помрачена од појавата на објектот. Затоа објектот мора да се отстрани од сликата.“ – Мондријан
Токму ова дело е едно од најзначајните во неговата бурна артистичка еволуција, која ќе го одведе до пиедесталот на модернизмот, или поточно до статусот да биде „тотем на сето она што модернизмот треба да претставува“. Развивајќи го движењето Де Стил или неопластицизмот, Мондријан верувал дека новата „чиста пластична уметност“ е потребна за да се создаде „универзална убавина“, па решил да се ограничи на трите основни бои (црвена, сина и жолта), трите основни вредности (црна, бела и сива) и двете основни насоки (хоризонтална и вертикална). Другото е историја.
„Интелектот ја збунува интуицијата.“ – Мондријан
Осаменикот со кого не било можно да се воспостават лични односи и мистериозниот поклоник на теософијата (спиритуалистичко, окултистичко движење во потрага по необјаснетите закони на природата и скриените човечки моќи), се претвора во основоположник на апстрактната уметност, доаѓајќи до точката во која неговиот уметнички вокабулар ќе се сведе само на наједноставни геометриски форми. Сликите на Мондријан даваат впечаток на бесконечност, на огромен простор што тој го нарекувал динамична рамнотежа во која сè се наоѓа во меѓусебна енергија. Неговото последно, незавршено дело „Victory Boogie Woogie“, е дел од колекцијата на Gemeentemuseum во Хаг, која содржи околу 300 други негови дела.
„За да му се доближите на спиритуалното во уметноста, треба што помалку да ја употребувате реалноста, бидејќи реалноста му се спротивставува на спиритуалното.“ – Мондријан
Веројатно исто толку познат како и неговите дела е фустанот Мондријан од „Колекцијата Мондријан“ на Ив Сен Лорен од 1965 година. „Сликарското платно што се носи“ го плени светот со концептуалниот дизајн што ги одразува апстрактноста и едноставноста. Подоцна и Мјуча Прада, која исто така е голем почитувач на фустанот Мондријан, го вгради истиот дизајн во својата колекција наречена AW11.
Метро-станицата Румјанцево во Москва, отворена во јануари 2016, ги има на себе композициите на Мондријан.
Во 2017 година, холандските власти решија да му оддадат почит на Мондријан „облекувајќи“ ја зградата на градскиот совет во Хаг во една од неговите најпрепознатливи композиции.
Мондријан ги инспирираше и The White Stripes за обвивката на нивниот албум „De Stijl“ од 2000 година.
